- إمبارح فازت العداءة المصرية بسنت حميدة، بالميدالية الذهبية للعبة سباق العدو 100 متر، في دورة ألعاب البحر الأبيض المتوسط، اللي بتقام حاليًا في الجزائر.
- بسنت فازت بالمركز الأول في المسابقة، بعد ما انهت السبق في زمن 11 ثانية و10 أجزاء من الثانية، ودا بعد ما إتأهلت من نصف النهائي بزمن قدره 11 ثانية و23 جزء من الثانية، ودا في الوقت اللي كان الجمهور الجزائري الشقيق بيشجعها وبيدعمها.
- بنبارك للاعبتنا بسنت حميدة، ونتمنى مزيد من الميداليات في البطولة اللي بتشارك فيها مصر بـ177 لاعب ولاعبة في الألعاب المختلفة.
**
- بسنت من مواليد 1996، في محافظة الإسكندرية، اتولدت في عائلة رياضية، والدتها كانت بطلة إفريقيا في الجمباز بأربع ميداليات ذهب، ووالدها كان بطل في التايكوندو.
- بسنت بتلعب في منتخب مصر لألعاب القوى من 11 سنة، لعبت وهي صغيرة كتير من الألعاب لحد ما استقرت في ألعاب القوى.
- بسنت قالت في تصريحات تلفزيونية سابقة بتعلق فيها على فوزه بالميدالية الفضية والبرونزية، في بطولة دورة ألعاب البحر المتوسط سابقة، أنه هدفها كان الوصول للنهائي والفوز بالبطولة، ودا كان تحدي بالنسبة لها، لإنه مكنش فيه لاعب مصري أو عربي في ألعاب القوى، بيوصل للنهائي في مسافة الـ100 والـ200 متر، ودا كان إنجاز أول مرة يحصل في مصر.
- كمان كانت أول مصرية بتتأهل لبطولة العالم لألعاب القوى، 2020 اللي اتلعبت في الدوحة. كمان اتأهلت لدورة الألعاب الأولمبية في طوكيو 2021، لكن بسبب الإصابة اضطرت للانسحاب.
- قالت بسنت وقتها عن الانسحاب: "أؤمن تماما إنها البداية في مشواري الرياضي وليست النهاية وبالرغم من صعوبة الموقف وعدم قدرتي الآن على تخطيه ولكن ربنا كريم جدا".
- عن بداياتها، قالت بسنت أنها كانت أثناء الدراسة مضطرة للتوفيق بين الدراسة وبين التدريب، ودا كان بيضطرها تدّرب بس في الأوقات المتاحة واللي كان ممكن تكون الساعة 1 أو 2 بالليل.
**
- كل يوم فيه مجال رياضي جديد بيطلع فيه مصري بإنجاز للبلد، ودا الحقيقة شئ مبشّر جدًا، ومعناه إنه إحنا عندنا فرص كبيرة جدًا للتفوق في رياضات كتير، بس دا مش محتاج أكتر من الدعم علشان دا يكون حال البلد المعتاد وما تبقاش مجرد مجهودات فردية تنتهي مع الوقت.
- مفيش بلد بتبقى رائدة في أي مجال خاصة الرياضة بين يوم وليلة، لكنها تراكمات لإنجازات اللاعيبة اللي تعبوا وشقيوا علشان يوصلوا لمنصات التتويج، وكل بطولة وميدالية لها أهمية كبيرة جدًا، في صناعة الريادة دي لذلك كل ميدالية لازملها حفاوة ودعم وتشجيع.
- بالتالي إحنا لازم نأكد كل مرة ونفكّر المسؤولين بأهمية دعم المواهب وتوفير الظروف اللي تخليهم يبدعوا ويتفوقوا في مجالاتهم، ودا طبعًا لازم يبدأ من الدعم المادي والاهتمام بكل موهبة لإنها بالضرورة ميدالية وإنجاز محتمل لمصر.
- مبروك للاعبتنا بسنت حميدة اللي هي بطلة أولمبية متوقعة إن شاء الله، فخورين بإنجازك ومقدرين لمجهودك الكبير علشان توصلي للإنجاز دا، وبنتمنالك دايمًا تكوني حاضرة في المركز الأول.
Kommentare
Kommentar veröffentlichen